गजल

तिहार बिशेस गजल सवाल र जवाफ सहित
दाजु-
यो पाली नि प्यारी बैनी आउन पाइन तिहारमा
तिम्रो हातको टिका माला लाउन पाइन तिहारमा

बैनि-
दाजु हजुर न आईदिदा रुवाउँछ भाई टिकाले
सयपत्री मखमली सुकाउँछ भाई टिकाले

दाजु-
साथी सङ्गी जम्मा हुँदै तिम्ले देउसी भट्टाउँदा
तिमी सङ्गै देउसी भैलो गाउन पाइन तिहारमा

बैनि-
मेरो यौटै दाजु पनि प्रवासैमा बास हुँदा
अब मेरा आँशुहरु चुवाउँछ भाई टिकाले

दाजु-
तस्बिरमा भए पनि सप्तरङ्गी टिका दिनु
देउसी भन्दै पारी गाउँ धाउन पाइन तिहारमा

बैनि-
सबै सङ्गी खुशी हुँदै मखमली माला उन्छन
फोटो हेर्छु अनि मुटु दुखाउँछ भाई टिकाले

दाजु-
के हो के हो रमादान अनि के के ईद अरे!
मुदिरको अनुमती पाउन पाइन तिहारमा

बैनि-
था'छ दाजै हजुरको मन मुटु यतै हुन्छ
अर्को साल रुने मन बुझाउँछ भाई टिकाले

दीपक पुन (दीप अँधेरी)
मक्रहर-९, रुपन्देही